سعودی اتحاد کی جنگ بندی کے اعلان کے بعد یمن پر پھر بمباری

صنعاء :سعودی اتحاد نے جنگ بندی کے اپنے اعلان کے بعد یمن کے صوبے صعدہ پر وحشیانہ حملے کئے ہیں جن میں رہائشی علاقوں کو بھاری نقصان پہنچا ہے۔ارنا کی رپورٹ کے مطابق سعودی اتحاد نے گزشتہ صوبہ صعدہ کے رہائشی علاقوں کو اپنی وحشیانہ جارحیت کا نشانہ بناتے ہوئے توپوں کے گولے داغے جس کے نتیجے میں 5 یمنی شہری زخمی ہوئے۔یہ حملے سعودی عرب کے اْس دعوے کے  بعد ہوئے ہیں جس میں اْس نے یہ کہا تھا کہ بدھ کی صبح  6 بجے سے ماہ رمضان المبارک میں امن کی برقراری  اور امن مذاکرات کے حصول کیلئے عارضی طور پر جنگ بندی کی جا رہی ہے۔سعودی عرب متحدہ عرب امارات, امریکہ اور چند دیگر ممالک کی مدد سے 26 مارچ 2015 سے یمن پر فوجی حملے کر رہا ہے اور اس ملک کا بری، بحری اور فضائی محاصرہ کئے ہوئے ہے۔